«Բնակիչն ու ՏԻՄ-ը՝ մեկ ուժ» - այս խորագիրն է կրում ՀաՄաՏեղ ծրագրի շրջանակներում Եղվարդ խոշորացված համայնքում իրականացվող  ծրագիրը:

Ապրիլի 23-ին ծրագրային միջոցառումների շարքում Zoom հարթակում անցկացվեց «Էլեկտրոնային մասնակցության գործիքների կիրառումը համայնքի պաշտոնական կայքի միջոցով» թեմայով սեմինար-քննարկում: «Տեղեկատվական համակարգերի զարգացման և վերապետրաստման կենտրոն» հասարակական կազմակերպության փորձագետ Ռոբերտ Գրիգորյանը Եղվարդի համայնքապետարանի պաշտոնական կայքի՝ http://yeghvard.am,  օրինակով ներկայացրեց այն գործիքակազմը, որը հնարավորություն է տալիս համայնքի բնակիչներին տեղեկանալ համայնքապետարանի աշխատակազմի գործունեությանը, ցանկության դեպքում նաև ակտիվորեն մասնակցել խնդիրների բացահայտմանն ու որոշումների կայացմանը:

Մանրամասն ներկայացվեցին կայքի հետևյալ հնարավորությունները.

• Ինչպես էլեկտրոնային եղանակով դիմել համայնքապետարան:
• Ինչպես մասնակցել հանրային քննարկմանը:
• Ինչպես գրանցել խնդիր:
• Ինչպես ստանալ ծառայություններ (թույլտվություններ, երեխային գրանցել մանկապարտեզ և այլն):
• Ինչպես հետևել ավագանու նիստերի առցանց հեռարձակումներին:
• Ինչպես համայնքի ավագանու, համայնքի ղեկավարի որոշումների վերաբերյալ գրանցել կարծիքներ:
• Ինչպես հետևել համայնքի բյուջեի եկամուտների և ծախսերի կատարմանը:

Ծրագրին մասնակից ակտիվ երիտասարդները բանախոսին ուղղեցին բազում հարցադրումներ, հանդես եկան առաջարկություններով, ինչպես նաև հանձն առան կիրառել նոր հմտությունները համայնքի կառավարմանը մասնակցելու գործում: Ձեռք բերվեց նաև պայմանավորվածություն, որ կայքում արձանագրված բացերի և թերությունների մասին սեմինարի մասնակիցները կիրազեկեն համայնքապետարանի աշխատակզմին և ավագանու անդամներին՝ նախատեսվող առաջիկա հանդիպումների ժամանակ: